நீதி: பக்தி
உபநீதி: நம்பிக்கை
புதிதாகத் திருமணம் செய்து கொண்ட தம்பதியர், தங்கள் இல்லத்திற்குத் திரும்பி செல்லும் வழியில், படகில் ஒரு ஏரியைக் கடந்து கொண்டிருந்தனர்; திடீரென ஒரு கடும் சூறாவளி ஏற்பட்டு, அதில் அவர்களின் படகு சிக்கிக் கொண்டது. மாவீரனான அந்த ஆண்மகன் பதட்டப் படாமல் தைரியமாக இருந்தான், ஆனால் அவனுடைய மனைவி பதட்டத்துடன் காணப் பட்டாள். அவர்களின் சிறிய படகானது, புயலின் சீற்றத்தினாலும், முரட்டு அலைகளாலும் சுற்றி வளைக்கப்பட்டுத் தத்தளித்து கொண்டிருந்தது. அது அவளை பெரிதும் அச்சுறுத்தியது. எச்ச்சமயத்திலும் படகு கவிழ்ந்து அதனுடன் அவர்களும் மூழ்கக் கூடும் என்பதை அவள் உணர்ந்தாள். எனினும் அவளுடைய கணவன் அமைதியாக உட்கார்ந்திருப்பதைக் கவனித்தாள். சிறிதும் சலனமின்றி எதுவுமே நடக்காதது போல அவன் அமர்ந்திருந்தான்.
கவலையுற்ற குரலில், “உங்களுக்குப் பயமாக இல்லையா? இதுவே நம் வாழ்க்கையின் கடைசித் தருணமாக இருக்கலாம்! நாம் பாதுகாப்பாகக் கரையை அடைவோமா என்பதற்கு உத்திரவாதமில்லை. ஏதேனும் அற்புதம் நிகழ்ந்தால் மட்டுமே நாம் உயிர் தப்ப முடியும்; இல்லையெனில் மரணம் நிச்சயம். உங்களுக்கு அச்சமாக இல்லையா? உங்களுக்குப் புத்தி பேதலித்து விட்டதா? உங்கள் மனம் தான் கல்லா?” என்று மனைவி தன் சாந்தமான கணவனைப் பார்த்துக் கேட்டாள்.
அவன் சிரித்துக் கொண்டே தன் வாளை அதன் உறையிலிருந்து உருவினான். மனைவி மேலும் குழப்பமடைந்தாள்; கணவன் என்ன செய்யப் போகிறான் என்று வியப்புடன் பார்த்து கொண்டிருந்தாள். கணவன் அவள் கழுத்தின் அருகில் வாளை வைத்தான். மிகச் சிறிய இடைவெளி மட்டுமே இருந்தது; கிட்டத்தட்ட அவளது கழுத்தை தொட்டுவிடும் அளவிற்கு, வாள் நெருக்கமாக இருந்தது.
அவன் தனது மனைவியிடம், “உனக்குப் பயமாக இருக்கிறதா?” என்று கேட்டான்.
மனைவி புன்முறுவலுடன், “நான் ஏன் பயப்பட வேண்டும்? கழுத்து முனையில் வாள் இருந்தாலும் அதைப் பிடித்திருக்கும் கைகள் உங்களுடையது. அப்படி இருக்கும் பொழுது, நான் ஏன் பயப்பட வேண்டும்? நீங்கள் என்னை நேசிக்கிறீர்கள் என்பதை நான் அறிவேன்” என்று கூறினாள்.
அவன் வாளை உறையில் திருப்பி செலுத்தியபடி, “என் பதிலும் இதேதான். கடவுள் என்னை நேசிக்கிறார் என்று எனக்கு தெரியும். புயல் அவரது கைகளில் உள்ளது. எது நடந்தாலும் நன்மைக்காகவே என்பதில் எனக்கு நம்பிக்கை உள்ளது. எல்லாமே கடவுளின் கைகளில் இருப்பதால், அவர் எல்லோரின் நன்மைக்காக மட்டுமே செயற்படுவார் என்று எனக்கு தெரியும். அவர் தவறு செய்ய மாட்டார்” என்று உறுதியுடன் கூறினான்.
கற்பித்தல்:
நாம் கடவுள் மேல் நம்பிக்கையை வளர்த்துக் கொள்ள வேண்டும். இதுவே நம் வாழ்வில் தக்கவைத்துக் கொள்ள வேண்டிய மாற்றம் ஆகும். இது நம் வாழ்க்கை முழுவதையும் மாற்றிவிடும். ஒரு போதும், அதில் சந்தேகம் இருக்கக் கூடாது.
தனக்குவமை இல்லாதான் தாள்சேர்ந்தார்க் கல்லால்
மனக்கவலை மாற்றல் அரிது.
தனக்கு ஒப்பில்லாத கடவுளின் திருவடிகளைத் தவறாது நினைப்பவர்க்கல்லாமல், மற்றவர்களுக்கு மனக்கவலையைப் போக்குவது கடினம்.
மொழி பெயர்ப்பு:
வள்ளி, சரஸ்வதி, ரஞ்சனி
Source: http://saibalsanskaar.wordpress.com
இது இரண்டு சமுத்திரங்களைப் பற்றிய ஒரு உண்மையான கதை. மத்தியத்தரைக்கடல் சார்ந்த வடுநிலத்தில் {Mediterranean basin} பிரபலமான சாக்கடல்(Dead Sea) அமைந்துள்ளது. பள்ளியில் படிக்கும் ஒவ்வொரு குழந்தைக்கும் உண்மையில் இது கடல் அல்ல; முரண்பாடாக சாக்கடல் என்று அழைக்கிறோமே தவிர, இது ஒரு ஏரி என்று தெரியும். பிறகு ஏன் கடல் எனக் கூறுகிறோம்? ஏரியின் நல்ல தண்ணீரும், கடலின் உப்பு நீரும், அவைகளை வேறுபடுத்தும் வகையில் உள்ள, குறிப்பிடத்தக்க வித்தியாசம். சாக்கடலில் உப்பு நிரம்பி உள்ளதால், இதைக் கடல் என அழைக்கிறோம். இது 67 கிலோ மீட்டர் நீளமும், மிகவும் பரவலான பகுதியில் 18 கிலோ மீட்டர் அகலமும், 1237 அடி ஆழமும் கொண்டது. பொதுவாக, கடல்களில் இருக்கும் நீரை விட, 
சாக்கடலில் 9 மடங்கு அதிகமாக உப்பு நிரம்பியுள்ளது. அதனால், அக்கடலில் தாவரங்கள் மற்றும் விலங்கினங்கள் வளமாக இருப்பதற்கோ அல்லது உயிர் வாழவோ வழியில்லாமல் இருக்கிறது. சாக்கடலில் உப்பின் அளவு ஏன் மிகுதியாக இருக்கிறது? எளிமையான பதில். ஜோர்டன் நதியிலிருந்து நீர் சாக்கடலுக்குச் செல்கின்றது. ஆனால், வடிகால் இல்லாததால், சாக்கடலின் நீர் வெளியேறுவதில்லை. சிறிதளவு நீர் ஆவியாக மாறுகின்றது ஆனால், பெரும்பாலும் கடலிலுள்ள உப்பு அங்கேயே தங்கி விடுகின்றதால், அங்கு சுற்றுப்புறச் சூழலில் ஒன்றுமே உயிர் வாழ முடிவதில்லை.
சாக்கடலின் வடக்கு திசையில், கலிலி (Galilee Sea) என்ற கடல் அமைந்துள்ளது. இது 13 மைல் நீளமும், 8 மைல் அகலமும் கொண்டது. சாக்கடலுடன் ஒப்பிட்டுப் பார்த்தால், இதன் வளங்கள் என்னவென்று தெரியுமா? இக்கடலில் தாவரங்கள் மற்றும் விலங்கினங்கள் செழிப்பாக வாழ்கின்றன. இதில் குறைந்தபட்சம், 2௦ வகையான மீன்கள் உயிர் வாழ்கின்றன. இப்பகுதியில், செழிப்பான மீன் பண்ணைகளும், சுற்றுப்புறச் 
சூழலில் இருக்கும் நிலத்தில் வளமான பயிர்களை அறுவடை செய்வதனாலும், பல மக்களுக்கு தொழில் வாய்ப்புகள் கிடைக்கின்றன. இந்தச் சிறிய கடலில் எப்படி இவ்வகையான செழுமை? எளிமையான இரகசியம் என்னவென்றால், தன் நீரை பகிர்ந்து கொள்வது தான். இந்த கலிலி கடலுக்குள் வரும் நீர் அதே ஜோர்டன் நதியிலிருந்து வரும் நீர் தான். ஆனால், வடிகால் வழியாக கலிலி கடலிலுள்ள நீர் வெளியேறுகின்றது. அதனால் தான், இங்கு வாழ்க்கை செழிப்பாகவும், வளமாகவும் இருக்கிறது.
Saibalsanskaar Tamil 